Պակիստանի բանակի հրամանատար Ասիմ Մունիրի հետ հանդիպման ժամանակ Իրանի նախագահ Մասուդ Փեզեշքիանը հայտարարել է, որ Միացյալ Նահանգները պետք է վերացնի իր սպառնալիքներն ու պատժամիջոցները, նախքան որևէ բանակցություն սկսելը։
Նրա կարծիքով՝ «տարածաշրջանում առաջացող բոլոր խնդիրները՝ լարվածության սրումից ու հակամարտություններից մինչև Հորմուզի նեղուցի աշխատանքի խափանումը, բխում են ամերիկացիների ռազմատենչ բնույթից»։
Իրանի նախագահը զգուշացրել է, որ Միացյալ Նահանգներն իր նպատակներին չի հասնի պատերազմի միջոցով։ Նա նաև նշել է, որ ԱՄՆ-ի հետ հակամարտությունը չի բխում ո՛չ Իրանի, ո՛չ տարածաշրջանի, ո՛չ էլ ամբողջ աշխարհի շահերից։
Փեզեշքիանը կոչ է արել Վաշինգտոնին ապացուցել Իրանի ժողովրդին, որ այլևս չի խաբի նրանց։ «Այսօր մեր ժողովուրդը չի վստահում Ամերիկային և կարծում է, որ եթե մենք բանակցությունների մեջ մտնենք, նրանք նորից կհարձակվեն մեզ վրա»,- պարզաբանել է Իրանի նախագահը։
