ԱՄՆ-ը աշխատում է Բելառուսից կալիումական պարարտանյութերի ձեռքբերման խոշոր գործարքի ուղղությամբ. Թրամփ
ԱՄՆ-ը աշխատում է Բելառուսից կալիումական պարարտանյութերի ձեռքբերման խոշոր գործարքի ուղղությամբ՝ Կանադայից մատակարարումների փոխարեն՝ հայտնել է Դոնալդ Թրամփը։
«Գինը զգալիորեն ցածր կլինի՝ կանադական արտադրանքի դիմաց վճարումների համեմատ։ Շատ լավ նորություն մեր ֆերմերների և անասնապահների համար»,- մանրամասնել է Սպիտակ տան ղեկավարը։
Սակայն Թրամփի հայտարարությունից ժամեր առաջ Ալեքսանդր Լուկաշենկոն նշել է, որ նույնիսկ եթե Բելառուսը վերականգնի արևմտյան շուկաներ կալիումական պարարտանյութեր մատակարարելու հնարավորությունը, ի վիճակի չի լինի դա անել, քանի որ առկա ծավալներն արդեն ամրագրված են այլ պայմանագրերով:
ԱՄՆ-ը գրեթե ամբողջությամբ կախված է կալիումական պարարտանյութերի ներկրումից։ Դրա մոտ 80%-ը բաժին է ընկնում Կանադային, իսկ 12%-ը՝ Ռուսաստանին։
Բելառուսը կալիումական պարարտանյութերի խոշորագույն արտադրողներից է: Սակայն արևմտյան շուկաներին հասանելիությունը սահմանափակ է 2020 թվականից գործող պատժամիջոցների պատճառով:
ԱՄՆ նախագահի պաշտոնը զբաղեցնելուց հետո Դոնալդ Թրամփը բարելավում է Մինսկի հետ հարաբերությունները, ի թիվս այլնի՝ չեղարկվել են կալիումական արդյունաբերության դեմ պատժամիջոցները։ Սակայն Եվրամիության կիրառած սահմանափակումները պահպանվում են:
