«Ռոսնեֆտ»-ը, որը Ռուսաստանի ամենամեծ նավթային ընկերությունն է արտահանման ծավալով, կրկին սահմանափակել է բենզինի և դիզելային վառելիքի վաճառքն առնվազն 7 մարզի իր բենզալցակայաններում։ Մոտ մեկ ամիս առաջ վերացված սահմանափակումները վերականգնվել են Կարելիայի, Բուրյաթիայի, Արխանգելսկի, Նովոսիբիրսկի և Պենզայի մարզերում, ինչպես նաև Կրասնոյարսկի և Անդրբայկալյան երկրամասերում։
Բենզինի սահմանափակումները վերականգնվել են ռուսական նավթավերամշակման գործարանների վրա Ուկրաինայի անօդաչու թռչող սարքերի վերսկսված հարձակումների ֆոնին. վերջին մեկուկես շաբաթվա ընթացքում հարձակման է ենթարկվել «Ռոսնեֆտ»-ի հետ կապված չորս օբյեկտ։
Կազմակերպության ղեկավարները մտավախություն ունեն, որ Ուկրաինայի կողմից ռուսական նավթավերամշակման գործարանների վրա կանոնավոր հարձակումները երկարաժամկետ վնաս կպատճառեն արդյունաբերությանը, հայտնել էր Bloomberg-ը։ Գործակալության աղբյուրների համաձայն՝ գործարանների մշտական վերանորոգումը կարող է դառնալ անիրագործելի, քանի որ վերամշակման բարդ կայանքների պահեստամասերը դժվար է ձեռք բերել։
