Թուրքիայի նախագահը նոյեմբերի 8-ի երեկոյան հայրենիք է մեկնել Ֆիզուլիի «միջազգային» օդանավակայանից, որտեղ նրա ինքնաթիռը վայրէջք էր կատարել նույն օրվա առավոտյան ժամերին։ Բաքվի «Ատլաս» վերլուծական կենտրոնի տնօրեն Էլխան Շահինօղլուն ֆեյսբուքյան գրառում է կատարել, որտեղ չի բացառել, որ Իրանի դեմ ամերիկյան կամ իսրայելական նոր հարվածի դեպքում Ադրբեջանի օդանավակայանները և ռազմական նշանակության ենթակառուցվածքները կարող են «հարավային ուղղությունից թիրախավորվել»։
Ադրբեջանցի մեկնաբանը հիշեցրել է Իրանի խորհրդարանի «մի պահպանողական պատգամավորի» հայտարարությունը, ըստ որի նախագահ Փեզեշքիանը այս տարվա մարտի առաջին օրերին խոչընդոտել է Ադրբեջանի տարածքի հրթիռակոծումը։
«Ստացվում է, որ եթե պահպանողական նախագահ Ռայիսին ուղղաթիռի աղետի հետևանքով զոհված չլիներ, ապա Ադրբեջանը հարավային ուղղությունից հարձակման կենթարկվեր»,- եզրակացրել է Շահինօղլուն։
Նա անդրադարձել է Ռուսաստանի պաշտպանության նախարարության հետ աֆիլացված տելեգրամյան ալիքների տարածած տեղեկությանը, ըստ որի՝ Չինաստանը Ադրբեջանի ռազմական և քաղաքացիական բոլոր օդանավակայանների մասին Իրանին հետախուզական տվյալներ է փոխանցել։ «Հատկապես նման իրավիճակներում է կարևորվում թուրք-ադրբեջանական ռազմավարական համագործակցությունը»,- ամփոփել է իշխանական վերլուծաբանը, ինչից հետևում է, որ Իրանին սահմանամերձ Ֆիզուլիում Թուրքիայի նախագահի իքնաթիռի վայրէջքը շատ հստակ ուղերձ է, թե իրականում ով է Ադրբեջանի անվտանգության երաշխավորը։
Ադրբեջանական մի քանի լրատվամիջոցներ, հղում անելով անանուն դիվանագիտական աղբյուրների, տեղեկացրել են, որ Ադրբեջանի նախագահ Իլհամ Ալիևը նոյեմբերի 11-12-ը կայցելի Թուրքիա և կմասնակցի СOP31-ի պաշտոնական գագաթնաժողովին։
Անդրադառնալով փակ բանակցություններից հետո Էրդողանի և Ալիևի մամուլի համար արված հայտարարություններին, իսրայելական Haaretz հեղինակավոր պարբերականը եզրակացրել է, որ, չնայած գործադրած ջանքերին, Թուրքիայի նախագահին չի հաջողվել այդ հարցում Իլհամ Ալիևին տարհամոզել, և նա շարունակում է «ամուր կանգնած մնալ Իսրայելի հետ հարաբերությունները պահպանելու և խորացնելու դիրքում»։
Ուշագրավ է, որ Էրդողանին դիմավորելու պաշտոնական արարողությանը Ադրբեջանի պաշտպանության նախարարին փոխարինել է գլխավոր շտաբի պետ Վելիևը։ Ալիևը Թուրքիայի նախագահին ներկայացրել է, որ Զաքիր Հասանովը կորոնավիրուսով հիվանդ է։ Մինչդեռ ադրբեջանական մի շարք լրատվամիջոցներ լուսանկարներ և տեսանյութեր են հրապարակել, որ նրան պատկերում են նույն օրը Բաքվում կայացած միջոցառումներում։
Վահրամ Աթանեսյան
