Ըստ հանրաքվեի նախնական արդյունքների, որոնք ստացվել են մեկ միլիոնից մի փոքր ավելի քվեաթերթիկների հաշվարկից հետո, Ալբերտայի բնակիչների մոտ 76%-ը քվեարկել է Կանադայից անկախանալու դեմ։ Կանադական CBC News հեռարձակող կորպորացիան կանխատեսում է, որ նահանգի անջատման կողմնակիցները պարտվել են:
Քվեարկության էր դրվել ոչ թե Ալբերտան Կանադայից անջատվելու հարցը, այլ, արդյոք պետք է այդ հարցով նոր հանրաքվե անցկացնել։ Ըստ Elections Alberta կայքի՝ ընտրողների մեծամասնությունը՝ մոտ 76%-ը, ընտրել է «Ալբերտան պետք է մնա Կանադայի նահանգ» տարբերակը։
«Հոկտեմբերի 19-ին Ալբերտայի բնակիչները հստակ ընտրություն կատարեցին։ Նրանք ընտրել են միասնությունը, միասին կառուցել ապագան և միմյանց մասին հոգ տանել: Նրանք առաջին հերթին ընտրել են Կանադան»,- նախնական արդյունքները մեկնաբանել է երկրի վարչապետ Մարկ Քարնին, որը նույնպես Ալբերտա նահանգից է։
Հանրաքվեի ամբողջական արդյունքները կարող են հայտնի դառնալ միայն ընտրատեղամասերի փակվելուց երկու օր անց, վերջնական պաշտոնական արդյունքները սպասվում են հոկտեմբերի 29-ին։
Նավթով և գազով հարուստ Ալբերտայի բնակիչները հանրաքվեի ընթացքում պատասխանել են տասը հարցի, որոնցից մեկը վերաբերել է անկախությանը: Մյուսները հիմնականում վերաբերել են տեղական իշխանությունների լիազորությունների շրջանակին: Ընդ որում, հանրաքվեի արդյունքները պարտադիր իրավական ուժ չեն ունենա։
