«Մարտի 1»-ի գործով դատական նիստը մեկ ժամ ընդմիջումից հետո վերսկսվել է:
Դատարանը քննում է ամբաստանյալ Ռոբերտ Քոչարյանի պաշտպանների ներկայացրած միջնորդությունը՝ ՀՀ գլխավոր դատախազ Արթուր Դավթյանին բացարկ հայտնելու վերաբերյալ:
Պաշտպան Հայկ Ալումյանը նշեց, որ միջնորդություն ներկայացնելու համար հիմք են հանդիսացել 2020 թվականի նոյեմբերի 30-ին վարչապետի մոտ իրավապահ համակարգի ղեկավարների մասնակցությամբ տեղի ունեցած խորհրդակցության ընթացքում հնչած մտքերը: Խորհրդակցությանն, ըստ նրա, քննարկվել են կոնկրետ քրեական գործեր:
«Այսինքն՝ ՀՀ վարչապետի և գլխավոր դատախազի միջև փոխհարաբերություններն այնպիսին են, որ վարչապետը կարող է Արթուր Դավթյանին հրավիրել իր մոտ և քննարկման առարկա դարձնել կոնկրետ քրեական գործերի ընթացքը: Գործադիր իշխանության հետ Դավթյանի փոխհարաբերությունները հակասում են «Դատախազության մասին» օրենքի մի շարք դրույթներին, և կարող է կասկած առաջանալ Դավթյանի՝ գործադիր իշխանությունից կախյալ լինելու վերաբերյալ»,- ընդգծեց Ալումյանը՝ հիշեցնելով, որ գլխավոր դատախազը «Մարտի 1»-ի քրեական գործի կողմ է հանդիսանում:
«Դատավարական լուծումները տրվում են բացառապես դատավարական ղեկավարման և գործող դատավարական վերահսկողության շրջանակներում»,- հայտարարեց դատախազ Գևորգ Բաղդասարյանը՝ հակադարձելով «Մարտի 1»-ի գործով ամբաստանյալ Ռոբերտ Քոչարյանի պաշտպանների միջնորդությանը՝ ՀՀ գլխավոր դատախազ Արթուր Դավթյանին բացարկ հայտնելու վերաբերյալ: «Գլխավոր դատախազը կախյալ վարքագիծ չունի, գլխավոր դատախազին որևէ մեկը հանձնարարություններ չի տալիս և չի կարող տալ»,- նշեց Բաղդասարյանը՝ հավելելով, որ Արթուր Դավթյանի մասնակցությունը ընդհանուր բնույթի քննարկումներին չի կարող խոսել կախյալ վարքագծի մասին:
Դատական նիստը, սակայն, ընդմիջվեց այն բանից հետո, երբ Քոչարյանի պաշտպաններից Արամ Վարդևանյանը դատախազ Բաղդասարյանի ելույթի ժամանակ սկսեց ռեպլիկներ նետել: Բաղդասարյանը հակադարձեց նրան, դահլիճում լեզվակռիվ սկսվեց:
Հիշեցնենք, որ Ռոբերտ Քոչարյանին մեղադրանք է առաջադրվել 2008 թվականին սահմանադրական կարգը տապալելու և 3 միլիոն դոլար կաշառք ստանալու համար:
