Գագիկ Ծառուկյանի դեմ ներկայացվող փաստական տվյալներն անհիմն էին, կալանքի՝ լուրջ օրինականության հետ կապված խնդիր կար թե՛ մեղադրանքի, թե՛ հիմնավոր կասկածի բացակայության առումով: Այդ մասին լրագրողների հետ զրույցում ասաց Ծառուկյանի պաշտպան Երեմ Սարգսյանը:
Նա նշեց, որ Ծառուկյանը դատարանում հայտնել է իր կարծիքը մեղադրանքի վերաբերյալ, նշել է, որ գործը շինծու է, և սա քաղաքական հետապնդում է:
Պաշտպանն ասաց, որ ԱԺ ներկայացված միջնորդության բովանդակության մեջ արարքը խիստ տարբերվում է այն արարքից, որը ներկայացվել է դատարան: «Երբ գլխավոր դատախազը միջնորդություն է ներկայացնում ԱԺ, ապա պետք է հիմնավորի, որ այդ արարքի պարագայում առկա է անձին անձնեռնմխելիությունից զրկելու անհրաժեշտություն, բայց պարզվում է՝ այլ ձևակերպումներով համաձայնություն են ստանում, դատարան այլ ձևակերպում են ներկայացնում:
Օրինակ՝ եթե ԱԺ ներկայացրել են, որ Ծառուկյանը խմբի կազմում անձամբ նաև կաշառք է տվել ընտրողներին, ապա դատարանում ներկայացված միջնորդության մեջ այսպես է՝ ղեկավարել է խումբ, որի շրջանակում տրվել է կաշառք:
Մեղադրանքի մեջ նշում չկա, որ Ծառուկյանը որևէ մեկին ասել է՝ տար կաշառք տուր, չկա ապացույց, որ կաշառք է տվել անձամբ և կամ իմացել է, որ որևէ մեկը կաշառք է տվել: Բոլորը ենթադրություններ են, ասում են՝ չի կարող որևէ մեկը կաշառք տա, և ղեկավար կազմը չիմանա»,- ասաց պաշտպանը:
Երեմ Սարգսյանը նշեց, որ Գագիկ Ծառուկյանին ազատությունից զրկելու միջնորդության վերաբերյալ որոշումը կհրապարակվի կիրակի՝ հունիսի 21-ին, ժամը 15:00-ին:
