Եվրոպայի խորհրդի 2019 թվականի տարեկան վիճակագրությունը՝ քրեակատարողական հիմնարկներում բեռնվածության մասին, «դրական» է որակում ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող դիտորդների խմբի նախագահ Հասմիկ Հարությունյանը: Միևնույն ժամանակ դիտորդական խմբի ղեկավարն ուշադրություն հրավիրեց՝ առանձին ՔԿՀ-ներում, առանձին խցերում դեռևս արձանագրվում է գերբեռնվածություն:
1lurer.am-ի հետ զրույցում դիտորդական խմբի ղեկավարը վկայեց. «Մասնավորապես, դեռևս 2020-ի հունվարի սկզբին դիտորդների խումբն այցելություն է կատարել «Նուբարաշեն» ՔԿՀ, և արձանագրվել է, որ խցերում ազատազրկվածների բաշխվածության հարցը խիստ անհամաչափ է. մի խցում կարող է լինել 2-3, մեկ այլ խցում՝ 7-8 անձ: Դա պարզաբանվում է որպես վերանորոգմամբ պայմանավորված իրավիճակ, բայց ներկայումս էլ շարունակվում է»:
Ազատ արձակվածներ
ՔԿՀ-ներում դիտորդական առաքելություն իրականացնող խմբի ղեկավարը կարևոր համարեց ընդգծել՝ 2019 թ. մայիսի դրությամբ համաներմամբ ազատ արձակված շուրջ 80 անձինք կատարել են 165 հանցագործություն:
«Ընդհանուր համակարգը պետք է այնպես փոխվի, որ մի կողմից կանխարգելվեն նոր հանցագործությունները, մյուս կողմից, եթե ազատ են արձակվում տարբեր մեխանիզմների կիրառմամբ, էնպիսի աշխատանք տարվի, որ հետագայում բացառվի կամ նվազեցվի բանտ վերադառնալու հնարավորությունը»:
Կալանքը՝ խափանման ծայրահեղ միջոց
Երկար տարիներ Հայաստանում խնդիր է եղել որպես խափանման միջոց առավելապես կալանքի կիրառման ընտրությունը: «Մենք ունենք ներդրված պրոբացիա, որը, կարծես թե, դեռ չի նպաստում, որ այդ պրակտիկան հաստատված լինի:
Եվ առհասարակ, վերականգնողական արդարադատության կոնցեպտում այս աշխատանքը դեռ ամբողջությամբ արդյունավետ չի իրականացվում: Այս ուղղությամբ մենք շատ աշխատանքներ ունենք անելու, պետք է շարունակական բնույթ կրի կալանքի հնարավորության նվազեցումը»:
