Ալբանիայում վարչապետ Էդի Ռամայի դեմ բողոքի ցույցերը, որոնք շարունակվում են վեցերորդ օրը, նոր թափ են ստացել: Կառավարության ղեկավարը հանդես է եկել մեկժամյա ուղերձով և հրաժարվել է հեռանալ պաշտոնից։
Բողոքի ցույցերը սկսվել են հոկտեմբերի 13-ին՝ Տիրանայում անցկացված հանրահավաքով։ Մասնակիցները պահանջել են լուծել համալսարաններում առկա խնդիրները, այդ թվում՝ բարձր ուսման վարձերն ու կոռուպցիան։
Ըստ AFP-ի՝ ցույցերն ուղեկցվել են անկարգություններով, ցուցարարները նետել են քարեր, «Մոլոտովի կոկտեյլներ» և հրատեխնիկա, այրել աղբամաններ, կոտրել պատուհաններ, այդ թվում՝ իշխող կուսակցության կենտրոնակայանի, հրկիզել են ոստիկանության բաժանմունքն ու ՆԳՆ շենքի մուտքը:
Լրատվականի փոխանցմամբ՝ հոկտեմբերի 18-ին վիրավորվել է ընդհանուր առմամբ 28 մարդ, այդ թվում՝ 19 ոստիկան, իսկ շաբաթվա ընթացքում վիրավորների ընդհանուր թիվը կազմել է 272, այդ թվում՝ 169 ոստիկան։
1 ժամ 14 րոպե տևողությամբ տեսաուղերձում վարչապետ Ռաման բացառել է իր հրաժարականի հնարավորությունը՝ պնդելով, որ բողոքի ցույցերի հետևում կանգնած են «արտաքին ուժեր», նշելով Իրանի և Ռուսաստանը։ Նա նաև պնդել է, որ ցույցերի առաջնագծում գտնվող ուսանողներին «պատանդ է վերցրել» 200-300 «դիմակավորված անձանց» փոքր խումբը, որոնք ոչ մի կապ չունեն ուսանողների հետ և «ցանկանում են քաոս սերմանել»։
Ռուսաստանի իշխանությունները հերքել են լրատվամիջոցների այն տեղեկությունները, որ Մոսկվան փորձում է ազդել ցուցարարների վրա:
