Իրանում վերականգնվել է ԱՄՆ-ի և Իսրայելի ռազմական գործողությունների հետևանքով վնասված նավթային օբյեկտների և պահեստարանների շուրջ 80 տոկոսը: Այս մասին հայտնել է Իրանի ազգային նավթային ինժեներաշինարարական ընկերության (NIOEC) գլխավոր տնօրեն Մոհամադ Մեշքինֆամը՝ փոխանցում է Fars գործակալությունը։
Պաշտոնյայի խոսքով ՝ վերականգնողական աշխատանքն ամբողջությամբ նախատեսվում է ավարտել իրանական աբան ամսվա վերջին, որն ավարտվում է նոյեմբերի 21-ին: Ընդ որում, նավթամթերքի մղման ենթակառուցվածքը վերականգնվել է մոտ 60 տոկոսով:
Նոյեմբերի 8-ին ԱՄՆ նախագահ Դոնալդ Թրամփը CNN-ի հետ հարցազրույցում Իրանի դեմ լայնածավալ ռազմական գործողությունների վերսկսումը քիչ հավանական է համարել: Միաժամանակ նա չի բացառել նոր հարվածները, եթե Թեհրանը չհամաձայնի Վաշինգտոնի հետ «շատ ուժեղ համաձայնագիր կնքել»։
Ամերիկացի առաջնորդի խոսքով՝ հետագա ռազմական գործողությունների վերաբերյալ որոշումը կախված կլինի իրանական կողմի հետ բանակցությունների արդյունքներից։
