Հայաստանն ու Բելգիան քննարկում են ջրային ոլորտում համագործակցության նոր հնարավորությունները
Ջրային կոմիտեի նախագահ Արամազդ Ղալամքարյանն ընդունել է Հայաստանում Բելգիայի Թագավորության արտակարգ և լիազոր դեսպան Էրիկ Դե Մույնքին, խմելու ջրի մաքրման համակարգերի արտադրությամբ, տեղադրմամբ և շահագործմամբ զբաղվող բելգիական BOSAQ ընկերության հիմնադիր և գլխավոր գործադիր տնօրեն Ջեյքոբ Բոսսաերին, ինչպես նաև ընկերության միջազգային հարաբերությունների պատասխանատու Էնթոնի Տարիգանին։
Հանդիպման ընթացքում քննարկվել են ջրային ոլորտում համագործակցության հնարավորությունները, մասնավորապես՝ խմելու ջրի ապակենտրոնացված մաքրման, ջրային ռեսուրսների արդյունավետ օգտագործման և շրջանաձև ջրօգտագործման՝ եվրոպական ստանդարտներին համապատասխանող տարբերակները։
Բելգիական BOSAQ ընկերությունը մասնագիտացած է ինքնավար, մոդուլային և վերականգնվող էներգիայով աշխատող ջրի մաքրման համակարգերի մշակման գործում։ Ընկերության կողմից առաջարկվող լուծումները հատկապես կիրառելի են հեռավոր և գյուղական համայնքների համար։
Քննարկվել են նաև արդյունաբերական ջրի վերօգտագործման հնարավորությունները, ինչպես նաև ջրային ենթակառուցվածքների զարգացմանն ուղղված նորարարական տեխնոլոգիական լուծումները։
Հանդիպման ընթացքում անդրադարձ է կատարվել նաև ջրային ենթակառուցվածքների զարգացման ծրագրերի ֆինանսավորման հնարավորություններին։ Մասնավորապես, քննարկվել են պետական և մասնավոր ֆինանսական կառույցների միջոցով դրամաշնորհների և արտոնյալ վարկերի ներգրավման հնարավորությունները։
Կողմերը կարևորել են Հայաստանի ջրային ոլորտում ժամանակակից և կայուն լուծումների ներդրմանն ուղղված ծրագրերի շրջանակում տեխնոլոգիական և փորձագիտական համագործակցության զարգացումը։
