Համազգեստը հնարավոր չի լինի գնել խանութում. Պապիկյանը՝ օրենսդրական նախաձեռնությամբ հանդես գալու մասին
Երբ մենք կավարտենք զորային փորձարկումը, և նմուշը վերջնական հաստատում կունենա, ես նախատեսում եմ ԱԺ-ում հանդես գալ օրենսդրական նախաձեռնությամբ, որով այդ տեսակի համազգեստը կարգելվի վաճառել, հնարավոր չի լինի գնել խանութում: Այդ մասին ասուլիսին ասաց պաշտպանության նախարար Սուրեն Պապիկյանը:
«Չի կարող Ձեր եղբայրը զանգել բանակից, ասել՝ համազգեստս մաշվել է, նորն առեք, ուղարկեք. չի լինի նման բան: Համազգեստը երբ մաշվի, մենք պետք է այդ խնդիրը լուծենք: Հիմա էլ կարգով այդպես է, բայց կան որոշակի հարցեր, որոնք էլ մեզ մղել են խնդիրն այս կերպ լուծելուն»,- դիմելով լրագրողին՝ ասաց նա:
Ավելի վաղ հայտնել ենք, որ պաշտպանության նախարարությունը նոր համազգեստի ամբողջական գնում դեռևս չի իրականացրել: Ամերիկյան ընկերության հետ կա պայմանագիր, որը ենթադրում է, որ ընկերությունը պետք է ներկայացնի փորձանմուշներ, տեխնիկական նկարագրեր և լեկալներ:
