Սահմանադրական բարեփոխումների խորհուրդը կողմ է քվեարկել Սահմանադրության 3-րդ գլխում իրավունքների պաշտպանության նոր երաշխիքների ձևակերպմանը
Կայացել է Սահմանադրական բարեփոխումների խորհրդի հերթական նիստը:
Ինչպես հայտնում են ՀՀ արդարադատության նախարարությունից, նիստին որպես օրակարգային առաջին հարց քննարկվել է Սահմանադրության 2-րդ և 3-րդ գլուխների տարանջատումը վերացնելու և սոցիալական, տնտեսական ու մշակութային հիմնական իրավունքները մարդու հիմնական իրավունքների գլխում ամրագրելու մասին առաջարկը։
Զեկույցից հետո անցկացվել են հարց-պատասխան և մտքերի փոխանակություն: Քննարկման արդյունքներով խորհուրդը որոշել է սոցիալ-տնտեսական, մշակութային իրավունքների պաշտպանության նոր երաշխիքներ ձևակերպել Սահմանադրության երրորդ գլխի շրջանակներում։
Որպես օրակարգային երկրորդ հարց ներկայացվել է Սահմանադրությամբ պետական և, հատկապես, ինքնավար մարմինների ստեղծման հնարավորության և դրանց կարգավիճակի վերանայման հարցը, ինչպես նաև պետական մարմինների լիազորությունների պատվիրակման հնարավորությունը մասնավոր իրավունքի սուբյեկտներին:
Խորհուրդը որոշել է այս հարցի քննարկումը շարունակել հաջորդ նիստին։
