«Նայեցի տեսանյութը, թե ինչպես է «Ուժեղ Հայաստան» կուսակցության Ստեփանավանի համայնքապետի թեկնածուն օրը ցերեկով ընտրակաշառք տալիս ավագանու թեկնածուներին, որ բաժանեն քաղաքացիներին»,- ֆեյսբուքյան էջում գրել է Ազգային ժողովի նախագահը:
Ռուբեն Ռուբինյանի խոսքով՝ ինքը տարօրինակ չի համարում կաշառքի բաժանումը այդ կուսակցության կողմից, սակայն տարօրինակ է համարում, որ նրանք չեն հասկանում, որ բռնվելու են:
ԱԺ նախագահը նշել է, որ բոլորը պատժվելու են և իրենց պատիժը կրելու են ՔԿՀ-ներում:
Ավելի վաղ տեղեկացրել էինք, որ 14 անձ է ձերբակալվել Ստեփանավանում հոկտեմբերի 25-ին կայանալիք ավագանու ընտրություններին «Ուժեղ Հայաստան» կուսակցության թեկնածուի օգտին քվեարկելու համար ընտրակաշառք տալու, դրան օժանդակելու, ինչպես նաև ընտրակաշառք ստանալու մեղադրանքներով:
Ազգային անվտանգության ծառայության իրականացրած միջոցառումների հիման վրա Հակակոռուպցիոն կոմիտեում նախաձեռնված քրեական վարույթով պարզվել է, որ այս կիրակի սպասվող ավագանու համամասնական ընտրություններում առաջադրված՝ «Ուժեղ Հայաստան» կուսակցության ցուցակը գլխավորող թեկնածուն, ընտրությանը մասնակցելու և իրենց կուսակցության օգտին քվեարկելու պայմանով, ավագանու անդամների թեկնածուների օժանդակությամբ Ստեփանավանի տարբեր բնակավայրերի մի քանի տասնյակ ընտրողների տվել է ընտրակաշառք։ Նա պատրաստվել է ընտրակաշառք տալ 3 տասնյակից ավելի ընտրողների նույնպես, ինչի համար առանձնացրել է յուրաքանչյուր ընտրողի համար նախատեսված գումարները, նշումներ կատարել և ցուցակներ կազմել։ Հակակոռուպցիոն կոմիտեն տեղեկությունները հաստատող տեսաձայնագրություն է հրապարակել:
«Ուժեղ Հայաստանն» արձագանքել էր կուսակցության` Ստեփանավանի համայնքապետի թեկնածու Արսեն Գևորգյանի և համակիրների ձերբակալությանը։
Մանրամասները՝ տեսանյութում:
