Գերմանիայի Համբուրգ քաղաքում չորեքշաբթի սկսվել է ուկրաինացի նախկին սպա Սերգեյ Կուզնեցովի դատավարությունը, որը մեղադրվում է 2022 թվականի սեպտեմբերին Բալթիկ ծովում «Հյուսիսային հոսք» գազատարը պայթեցնելու համար։
Հունիսի վերջին Կուզնեցովին պաշտոնապես մեղադրանք է առաջադրվել «քաղաքացիական էներգետիկ ենթակառուցվածքի օբյեկտի վրա հարձակման, պայթուցիկ նյութերի միջոցով պայթյուն առաջացնելու և կառույցների ոչնչացման» համար։ Ըստ դատախազության՝ նա պատերազմական հանցագործություն է կատարել՝ ռազմական միջոցներով քաղաքացիական օբյեկտ վնասելով:
Կուզնեցովի փաստաբանը՝ իտալացի Նիկոլա Կանեստրինին, դատարանին խնդրել է կարճել գործը՝ պնդելով, որ մեղադրող կողմը չունի համոզիչ ապացույցներ իր պաշտպանյալի դեմ, հաղորդում է AFP-ն:
Կուզնեցովը ձերբակալվել է Իտալիայում՝ 2025 թվականի ամռանը՝ Գերմանիայի տված եվրոպական օրդերի հիման վրա, և նույն թվականի նոյեմբերին արտահանձնվել է Գերմանիային։ Նա հերքել է բոլոր մեղադրանքները։
Դատարանի շենքի մոտ Ուկրաինայի կողմնակիցներն ուկրաինական դրոշներով բողոքի ցույց են կազմակերպել՝ ի պաշտպանություն Կուզնեցովի: Մասնակիցները պաստառներ են պահել՝ «Ռուսաստանն ահաբեկիչ է» գրությամբ, և մերժել պատերազմական հանցագործությունների մեղադրանք առաջադրելու որոշումը:
