Շուրջ 1-1,5 տարի առաջ լրջորեն հետաքրքրված էինք բացառապես փոքր մոդուլյար ռեակտորներով ատոմակայան ունենալու հնարավորությամբ, որովհետև այդ տեխնոլոգիան ավելի նոր տեխնոլոգիա է, և միևնույն ժամանակ էներգետիկ համակարգում այդ քանակի էլեկտրաէներգիայի անհրաժեշտություն կար: Հիմա հետաքրքրված ենք ոչ միայն փոքր մոդուլյար ռեակտորներով, այլև ավանդական տեխնոլոգիայով: Այդ մասին Ազգային ժողովում 2027 թվականի պետական բյուջեի նախնական քննարկման ժամանակ ասաց ՏԿԵ նախարար Դավիթ Խուդաթյանը:
«Ինչո՞վ է պայմանավորված այդ փոփոխությունը: Առաջին հերթին մեծ հետաքրքրություն կա ՀՀ-ում ԱԲ գործարանների կառուցման մասով:
Մենք մի քանի ծրագրեր այս պահին իրականացնում ենք, որոնցից ամենախոշորը Firebird-ն է. դա փուլային եղանակով է իրականացվում: Ըստ էության, հիմա Հայաստանում դժվար է պատկերացնել մի իրավիճակ, որ կարող ենք ունենալ էլեկտրաէներգիայի ավելցուկ: Տեսականորեն ինչքան էլեկտրաէներգիա արտադրվի ՀՀ-ում, միայն այդ կարգի կառույցները կարող են ամբողջ ծավալը սպառել: Հետևաբար ուսումնասիրում ենք նաև ավանդական տեխնոլոգիայով, մասնավորապես՝ 1000-1200 մեգավատտ դրվածքային հզորությամբ մոդուլների մասը:
Ուսումնասիրում ենք նաև փոքր մոդուլյար ռեակտորներով ավելի մեծ հնարավորություններ ունենալու հարցը»,- ասաց նա:
Ըստ նախարարի՝ մոդելի ընտրությունը պայմանավորված է ֆինանսական արժեքով, քանի որ դա էական ազդեցությունն է ունենալու ՀՀ-ում էլեկտրաէներգիայի սակագնի վրա:
