Տրանսպորտային միջոց գնելու կամ վաճառելու գործարքը քաղաքացիները հնարավորություն ունեն իրականացնել առցանց՝ ցանկացած վայրից՝ առանց Հաշվառման-քննական բաժին այցելելու անհրաժեշտության։ Այդ մասին հայտնում են ՆԳՆ-ից:
Արդեն հարթակում կատարվել է 2432 գործարք, որից 1798-ը՝ առուվաճառքի, 634-ը՝ նվիրատվության։
Թվային հարթակում գործարք կատարելու համար և՛ գնորդը, և՛ վաճառողը պարտադիր պետք է «Ես եմ» համակարգում անցնեն նույնականացում։
Ավտոմեքենայի սեփականության իրավունքը փոխանցելու համար անհրաժեշտ է՝ վաճառելու դեպքում նախ գնորդի հետ համաձայնեցնել վաճառքի գինը, իսկ նվիրատվության դեպքում՝ վճարել ավտոմեքենայի հաշվառման գործողությունների տուրքը։
Գործարք կատարելու համար անհրաժեշտ է մուտք գործել կայք, լրացնել կոնտակտային և տրանսպորտային միջոցի տվյալները, կատարել անհրաժեշտ բոլոր գործողությունները։
Թվային հարթակից օգտվելիս առաջացող հարցերի դեպքում քաղաքացիները կարող են դիմել Թեժ գիծ՝ զանգահարելով 060 83 83 02 հեռախոսահամարով։
car.mia.gov.am հարթակը ներդրվել է 2025 թվականի սեպտեմբերի 1-ից՝ նպատակ ունենալով քաղաքացիների համար առավել դյուրին դարձնել տրանսպորտային միջոցների հետ կապված գործարքները, թեթևացնել հաշվառման-քննական ստորաբաժանումների ծանրաբեռնվածությունը։
