Ըստ Եվրոպական հանձնաժողովի ղեկավարի՝ ժամանակն է, որ Բելգրադը կոնկրետ քայլեր ձեռնարկի Եվրամիությանը միանալու ուղղությամբ։
«ԵՄ-ին տանող ճանապարհը պահանջում է, որ մենք ավելի մեծ համաձայնեցվածության հասնենք մեր արտաքին քաղաքականության հարցում, այդ թվում՝ Ռուսաստանի դեմ պատժամիջոցների»,- ասել է Ուրսուլա ֆոն դեր Լայենը՝ Բելգրադում Սերբիայի նախագահ Ալեքսանդր Վուչիչի հետ մամուլի ասուլիսում։
Նա շնորհակալություն է հայտնել Բելգրադին, որ Սերբիան արդեն 61 տոկոսով համապատասխանում է Եվրամիության արտաքին քաղաքականությանը, սակայն ընդգծել է, որ ավելին է պահանջվում «վստահելի գործընկեր» համարվելու համար:
Վուչիչը պատասխանել է, որ ԵՄ-ին անդամակցությունը Սերբիայի արտաքին քաղաքականության ռազմավարական նպատակն ու արտաքին քաղաքականության առաջնահերթությունն է։
Արևմտյան Բալկանների հինգ երկիր՝ Ալբանիան, Բոսնիա և Հերցեգովինան, Հյուսիսային Մակեդոնիան, Չեռնոգորիան ու Սերբիան, ունեն ԵՄ անդամակցության պաշտոնական թեկնածուի կարգավիճակ։ Անդամակցության հայտ է ներկայացրել նաև ինքնահռչակ Կոսովոն։
