Հայաստանի պետական ֆիլհարմոնիայի հրավերով մայիսի 8-ին՝ ժամը 19:00-ին, «Առնո Բաբաջանյան» համերգասրահում մենահամերգով հանդես կգա լեգենդար երաժիշտ Մարկ Դրոբինսկին։ Այս մասին տեղեկացնում է ԿԳՄՍ նախարարությունը:
Համերգին կհնչեն Մանուել դե Ֆալյայի, Իգոր Ստրավինսկու, Մայքլ Բրոնների, Անտոնիո Սանտանայի թավջութակի սյուիտները: Համերգին կմասնակցի դաշնակահար Աստղիկ Ղուկասյանը։
Մարկ Դրոբինսկին ուսանել է Մոսկվայի կոնսերվատորիայում՝ մեծանուն Մստիսլավ Ռոստրոպովիչի դասարանում, որի անմիջական ազդեցությամբ էլ կերտվել են նրա կատարողական արվեստի խորությունն ու վարպետությունը։
Անվանի երաժիշտը համերգներով հանդես է եկել է աշխարհի ամենահեղինակավոր բեմերում՝ ներառյալ Ամստերդամի «Կոնցերտգեբաուն», Լոնդոնի «Վիգմոր Հոլ», Բուենոս Այրեսի «Տեատրո Կոլոն», Փարիզի «Սալ Պլեյել», Մոսկվայի և Սանկտ Պետերբուրգի ֆիլհարմոնիայի մեծ դահլիճներում և այլուր։
Մարկ Դրոբինսկին համագործակցել է այնպիսի դիրիժորների հետ, ինչպիսիք են՝ Մստիսլավ Ռոստրոպովիչը, Առնոլդ Կացը, Ֆուատ Մանսուրովը, Վալերի Գերգիևը, Սաուլիուս Սոնդեկիսը, Շառլ Դյուտուան, Մաքսիմ Շոստակովիչը և ուրիշներ։
