Գեղարքունիքի մարզպետ Կարեն Սարգսյանը նոյեմբերի 1-ին մարզպետարանում ընդունել է ԵՄ առաքելության դիտորդական թիմի անդամներին՝ աշխատանքային թիմի ղեկավար Լինն Նետտելվիկի գլխավորությամբ։ Այդ մասին ասված է մարզպետի Ֆեյսբուքի էջում:
«Ի շարունակություն նախորդ օրը՝ հոկտեմբեր 31-ին, Վարդենիսում և հրետակոծությունից տուժած մի շարք բնակավայրերում տեղի ունեցած աշխատանքային քննարկումների և շրջայցի ընթացքում տրամադրած տեղեկատվության, մանրամասներ ներկայացրի 2022 թվականի սեպտեմբերի 13-14-ի թշնամու ռազմական ագրեսիայի, վայրագությունների, հրետակոծությունից տուժած բնակավայրերում ստեղծված վիճակի և այլնի մասին՝ դրանք առավել առարկայական դարձնելով լուսանկարների ցուցադրմամբ։
Խոսելով հրետակոծված բնակավայրերում վնասված շենք-շինությունների մասին՝ տեղեկացրի, որ ՀՀ կառավարության աջակցությամբ այս պահին ընթանում են մասնակի վնասված բնակարանների վերանորոգման աշխատանքներ, իսկ ամբողջովին տուժած ութ բնակարանների խնդիրները Կառավարությունը կլուծի նորի կառուցմամբ։
Այնուհետև խոսեցինք մարզում առկա ռիսկերի, հրետակոծությունից տուժած բնակավայերին մատակարարվող ջրային ռեսուրսների սանիտարական վիճակի պահպանության, տեղահանվածներին և դպրոցականներին հոգեբանական աջակցության ցուցաբերման և այլ թեմաների մասին։
Պայմանավորվածություն ենք ձեռք բերել պարբերաբար հանդիպել, քանզի նման քննարկումները նպաստում են աշխատանքների ճիշտ և արդյունավետ կազմակերպմանը»,- նշված է գրառման մեջ։
