Ամերիկացի սենատորները 50 կողմ, 48 դեմ ձայների հարաբերությամբ հավանություն են տվել պետական պարտքի սահմանաչափը ժամանակավորապես բարձրացնելու օրինագծին՝ դեֆոլտից խուսափելու համար՝ հաղորդում է Associated Press- ը:
Սենատում դեմոկրատների և հանրապետականների միջև երկար քննարկումների արդյունքում ընդունված օրինագիծը նախատեսում է մինչև այս տարվա դեկտեմբերի 3-ը պետական պարտքի սահմանաչափը բարձրացնել 480 մլրդ դոլարով:
Ենթադրվում է, որ Ներկայացուցիչների պալատում, որը վերահսկում են դեմոկրատները, օրինագծի հաստատման խնդիր չի լինի: Ներկայացուցիչների պալատի խոսնակ Նենսի Փելոսին ասել է, որ պատրաստ է կոնգրեսականներին հետ կանչել արձակուրդից՝ փաստաթուղթը հնարավորինս արագ ընդունելու համար, որից հետո այն պետք է ստորագրի նախագահը:
Associated Press-ը նշում է, որ դա «պարզապես ժամանակավոր հետաձգում է», քանի որ հանրապետական և դեմոկրատ օրենսդիրները մինչև տարեվերջ դեռ պետք է համաձայնեցնեն պարտքի սահմանաչափը:
Միացյալ Նահանգներում պետական պարտքի սահմանաչափը սահմանում է Կոնգրեսը և կարող է ավելացվել միայն այդ մարմնի հաստատմամբ: Ինչպես հաղորդվում է, հոկտեմբերի սկզբին պետական պարտքն արդեն հատել է թույլատրելի շեմը՝ 28 տրիլիոն դոլարը: Դեֆոլտից խուսափելու համար այն գերազանցելու որոշումը պետք է օրենքով ձևակերպվի մինչև հոկտեմբերի 18-ը:
