Եվրոպայում գազի գինը գերազանցել է 1900 դոլարը հազար խորանարդ մետրի դիմաց: Եվրոպական էներգետիկ շուկայում տիրող իրավիճակը վկայում է, որ էներգետիկ ոլորտում չմտածված գործողությունները հղի են անհավասարակշռությամբ՝ ասել է ՌԴ նախագահ Վլադիմիր Պուտինը:
«Ինչպես գիտեք, էներգետիկայի համաշխարհային շուկան չի հանդուրժում իրարանցում և խարխափումներ, ներդրումային ծրագրերն այստեղ երկարաժամկետ են: Հետևաբար կտրուկ, չմտածված գործողությունները կարող են հանգեցնել և, դատելով շուկայի ներկա վիճակից, արդեն հանգեցրել են լուրջ անհավասարակշիռ վիճակի, ինչը մենք այժմ տեսնում ենք եվրոպական էներգետիկ շուկայում»:
Ըստ Պուտինի, գազի ճգնաժամի առաջացման մյուս գործոնը քամու էներգիայի արտադրության կրճատումն է շոգի և առանց քամիների եղանակի պատճառով, հայտնում է РИА Новости-ն:
«Պետք է հաշվի առնել, որ վերջին տասը տարվա ընթացքում Եվրոպայում էներգետիկ բալանսը կտրուկ փոխվել է: Տարածաշրջանի շատ երկրներ հրաժարվել են ածուխի և ատոմակայանների շահագործումից՝ հօգուտ եղանակից կախված քամու էներգիայի»,- ավելացրել է նախագահը:
Եվրոպայում գազի ճգնաժամի պատճառներից մեկն էլ, ըստ Ռուսաստանի նախագահի, Եվրահանձնաժողովի թույլ տված սխալն է: Պուտինը սխալ է համարել գազի երկարաժամկետ պայմանագրերի կրճատման ԵՀ կուրսը:
Նա միաժամանակ վստահեցրել է, որ Ռուսաստանը կապ չունի Եվրոպայում ստեղծված գազային ճգնաժամի հետ: «Ռուսաստանը միշտ եղել և մնում է իր սպառողների համար գազի հուսալի մատակարար ամբողջ աշխարհում՝ ինչպես Ասիայում, այնպես էլ Եվրոպայում: Միշտ ամբողջությամբ կատարում է իր բոլոր պարտավորությունները»,- ասել է Ռուսաստանի ղեկավարը:
