Հայաստանի ու Հյուսիսային Խորասանի միջև առևտրային հարաբերությունների ընդլայնումը կնպաստի նահանգի զարգացմանը. Էբրահիմ Ղորբանի
Հյուսիսային Խորասանի կոոպերատիվների պալատի նախագահ Էբրահիմ Ղորբանին իրանական ISNA գործակալությանը տված հարցազրույցում ներկայացրել է նահանգային պատվիրակության՝ Հայաստան կատարած այցի արդյունքները: Ըստ պաշտոնյայի՝ պայմանավորվածություն է ձեռք բերվել Հայստանում Հյուսիսային Խորասանի հետ առևտրի զարգացման, իսկ Հյուսիսային Խորասանում՝ Հայաստանի հետ առևտրի զարգացման գրասենյակներ բացելու վերաբերյալ: Ղորբանին շեշտել է, որ Հայաստանը դեպի ԵԱՏՄ դարպաս է, և Հայաստանի ու Հյուսիսային Խորասանի միջև առևտրային հարաբերությունների ընդլայնումը կնպաստի նահանգի զարգացմանը:
Նա շեշտել է, որ օտարերկրյա ներդրողների համար նահանգում ապահովվելու են բոլոր անհրաժեշտ պայմանները, և առաջիկայում հայկական զբոսաշրջային ընկերություն է գրանցվելու Հյուսիսային Խորասանում:
Ղորբանին նշել է, որ նախքան Հայաստան պատվիրակություն ուղարկելը ուսումնասիրվել են հայկական շուկայի հնարավորություններն ու կարիքները: Նա հավելել է, որ պատվիրակության կազմում ներգրավված են եղել տարբեր ոլորտների արտադրողներ, ովքեր հայ գործընկերների հետ մի շարք պայմանավորվածություններ են ձեռք բերել: Ղորբանին ընդգծել է նաև, որ ՀՀ հետ հարաբերությունների ընդլայնման առավելություններից մեկը Երևանում իրանական բանկի առկայությունն է:
