ՀԱՊԿ գլխավոր քարտուղար Ստանիսլավ Զասը չի կարողացել պատասխանել այն հարցին՝ արդյոք պահպանվո՞ւմ է Լեռնային Ղարաբաղի հակամարտության գոտում սիրիացի վարձկանների ներկայության սպառնալիքը: Այս մասին տեղեկացնում է Коммерсанть-ը:
«Մենք տեղեկություններ ունեինք Լեռնային Ղարաբաղի հակամարտության գոտում Սիրիայից ժամանած վարձկանների ներկայության ու ռազմական գործողություններին մասնակցելու մասին, և այն գնահատել ենք որպես որոշակի ռիսկեր: Որտե՞ղ են այժմ այդ գրոհայինները, կամ նրանք այնտե՞ղ են, թե՞ ոչ, դժվարանում եմ պատասխանել»,- այսօր առցանց ճեպազրույցի հայտարարել է Զասը:
ՀԱՊԿ գլխավոր քարտուղարը նշել է, որ Լեռնային Ղարաբաղում իրավիճակն այժմ վերահսկում են այդ գործընթացում ներգրավված ուժերը՝ խաղաղապահ ուժերը, ինչպես նաև Ադրբեջանն ու Հայաստանը:
«Մենք ելնում ենք նրանից, որ ցանկացած վարձկան և սիրիացի գրոհային պետք է հեռանա այդ տարածքից»,- ընդգծել է Ստանիսլավ Զասը:
Հիշեցնենք, որ հակամարտության ժամանակ տարածաշրջանում օտարերկրացի վարձկանների ներկայության մասին հայտարարել էին Ռուսաստանի և Հայաստանի իշխանությունները, ինչպես նաև Ֆրանսիայի նախագահ Էմանուել Մակրոնը:
