Իրանի զինված ուժերն այսօր երկրի հարավարևելյան Մակրան շրջանում հերթական զորավարժություններն են սկսել՝ փոխանցում է Tasnim լրատվական գործակալությունը:
Eqtedar ծածկանունը ստացած զորավարժություններում ներգրավված են օդադեսանտային ստորաբաժանումները, հատուկ նշանակության ջոկատներն ու արագ արձագանքման բրիգադները:
Զորավարժություններին մասնակցող ուժերը թիկունքից ռազմական աջակցություն կստանան օդային ու ցամաքային ուժերից: Միջոցառման գլխավոր նպատակն է գնահատել Իրանի ցամաքային զորքերի շարժական հարձակողական ստորաբաժանումների և արագ արձագանքման կորպուսի շարժունակությունն ու հարձակողական ուժը:
Պարբերականը նշում է, որ Իսլամական Հանրապետության զինված ուժերը բազմաթիվ լայնածավալ զորավարժություններ են անցկացրել վերջին շաբաթների ընթացքում:
