Նյութատեխնիկական ապահովման մասնագետներն Արցախի Բերդաշեն գյուղում կառուցել են բլոկ-մոդուլային ավան: Այդ մասին հայտնում է ՌԴ ՊՆ կայքը:
Ռուսաստանի պաշտպանության նախարարի տեղակալ, բանակի գեներալ Դմիտրի Բուլգակովին զեկուցել են, որ նոր մոդուլային ավանում բնակվելու է 60 մարդ: Այն կառուցվել է ռուսական խաղաղապահ զորախմբի զինծառայողների համար՝ Արցախում հարմարավետ կյանքի և կենցաղային պայմաններ ստեղծելու նպատակով:
Ավելի վաղ Ռուսաստանի ՊՆ նյութատեխնիկական ապահովման մասնագետները հնարավորինս արագ երկու բլոկ-մոդուլային ավան էին կառուցել Ստեփանակերտում և Գետավան բնակավայրում:
Նման ավանները լիարժեք ինքնավար կառույցներ են, որոնք հագեցած են կենսապահովման բոլոր անհրաժեշտ համակարգերով՝ էլեկտրամատակարարում, ինքնավար ջեռուցում, սանհանգույցներ, ջրամատակարարում, կոյուղի: Սենյակներն ապահովված են կահույքով՝ մահճակալ, զգեստապահարան, խոհանոցային հավաքածու, սեղաններ, աթոռներ, լոգարան, ինչպես նաև կենցաղային տեխնիկայով՝ էլեկտրական վառարան, սառնարան, լվացքի մեքենա, միկրոալիքային վառարան, հեռուստացույց, օդորակիչ, կաթսա:
Յուրաքանչյուր քաղաքի տարածքում կա մարզադահլիճ արհեստական խոտածածկով, բաղնիք, բժշկական կենտրոն, չորանոց, հագուստի մաքրման սենյակ, հանգստի սենյակ, գրասենյակ, պահեստ, ճաշարան և մթերային խանութ:
Բլոկ-մոդուլային ավանները կարող են օգտագործվել ինչպես ցածր ջերմաստիճան ունեցող շրջաններում, այնպես էլ տաք կլիմա ունեցող երկրներում:
