Ռուսաստանի խաղաղապահ զորակազմի հատուկ նշանակության բժշկական ստորաբաժանումը (МОСН) շարունակում է օգնություն տրամադրել տեղի բնակչությանը, ինչպես Ստեփանակերտում, այնպես էլ Արցախի այլ բնակավայրերում: Անցած մեկ օրվա ընթացքում բժշկական օգնություն է ստացել Կաղարծի գյուղի 21 բնակիչ: Այդ մասին հայտնում է ՌԴ ՊՆ-ն:
Ընդհանուր առմամբ,ավելի քան 900 արցախցի, այդ թվում ՝ ավելի քան 120 երեխա, որակյալ բժշկական օգնություն է ստացել ՊՆ դաշտային հիվանդանոցում: Տեղաբաշխված շարժական հիվանդանոցում որակավորված թերապևտների, վիրաբույժների և այլ մասնագետների կողմից հետազոտվելուց հետո քաղաքացիները ստացել են խորհրդատվություններ և անհրաժեշտ նշանակումներ:
Տեղի բնակիչների դիմումները, որպես կանոն, կապված են տարբեր քրոնիկ հիվանդությունների, սրտանոթային և էնդոկրին համակարգերի հիվանդությունների սրացման և ատամնաբուժական օգնության ապահովման հետ: МОСН ստորաբաժանումներում աշխատում է ավելի քան 60 բժիշկ, այդ թվում `ռազմական վիրաբույժներ, անեսթեզիոլոգ-ռեանիմատոլոգ, թերապևտներ և համաճարակաբաններ:
