Մինչ Եվրոպան սովորում է բնականոն կյանք վերադառնալ կորոնավիրուսի համավարակի պայմաններում, բնությունը նոր անակնկալներ է մատուցում: Սիբիրի Վերխոյանսկ քաղաքում արձանագրվել է 38 աստիճան տաքություն՝ ըստ Ցելսիուսի, ինչ համարվում է նոր ռեկորդ՝ գրում է Euronews-ը:
Ծայրահեղ տապը, որը կենտրոնացած է Սիբիրում, սակայն տարածվում է նաև հյուսիսային այլ շրջաններում, անտառային հրդեհներ է առաջացրել Հյուսիսային բևեռում:
Վերխոյանսկն ու այս տարածաշրջանի շատ հատվածներ մոլորակի ամենացուրտ կետերից մեկն են, որտեղ ձմռանն օդի ջերմաստիճանը նվազում է՝ հասնելով մինչև 50 աստիճան ցրտի: Սակայն տարվա այս սեզոնին այստեղ սովորաբար 20 աստիճան է՝ ըստ Ցելսիուսի: Միանգամայն տագնապալի է, որ այստեղ գրանցվել է գրեթե կրկնակի բարձր ջերմաստիճան՝ 38 աստիճան:
Գիտնականներին, սակայն, առավելապես մտահոգում է ոչ թե ջերմաստիճանի բարձրացումը: ՄԱԿ-ի հավաստմամբ՝ կլիմայական փոփոխությունների տեմպն արագացել է:
