Թուրքիայի «Ժողովուրդների դեմոկրատական կոնգրեսը», որը ներառում է մոտ 20 կուսակցություն ու քաղաքացիական նախաձեռնություն, Հայոց ցեղասպանության 105-րդ տարելիցի կապակցությամբ ուղերձ է հղել։
«1915 թ․ապրիլի 18-ը և ապրիլի 24-ը օսմանյան «Միություն և առաջադիմություն» կուսակցության կառավարման ժամանակաշրջանի երկու մեծ ողբերգություններն են, ասորիների և հայերի ցեղասպանությունները։
Հայոց ցեղասպանությունը Անատոլիայի ժողովուրդների ինքնորոշման իրավունքի դեմ իրականացված հարձակում է։ Հայոց ցեղասպանությունը ոչ միայն 1․5 մլն հայերի ջարդ է, այլև դարեր ի վեր Անատոլիայի ամբարած մշակույթի ոչնչացումը։ Այն 105 տարի չփակված վերք է»,- ասվում է ուղերձում:
Թուրքիայի «Ժողովուրդների դեմոկրատական կոնգրեսը» հայտարարել է, որ իրենք կողմ են, որպեսզի «օսմանյան-թուրքական իշխող վերնախավը դատապարտվի ցեղասպանության հանցագործության համար, ինչպես նաև կողմ են ներողություն խնդրել հայ ժողովրդից, անվերապահորեն ճանաչել արևմտահայերի սերունդներին վերադարձնելու իրավունքը՝ միաժամանակ ապահովելով նրանց գույքի վերադարձը և ինչ-որ չափով վիրակապել այդ հոսող վերքը»։
