Թեհրանի կողմից խոցված ուկրաինական ինքնաթիռի առիթով իրանական պատվիրակություն կմեկնի Կիև
Ուկրաինայի արտաքին գործերի նախարար Վադիմ Պրիստայկոն հայտարարել է, որ առաջիկայում Իրանից պատվիրակություն կայցելի Կիև՝ քննարկելու Թեհրանում ուկրաինական Boeing մակնիշի մարդատար ինքնաթիռի կործանման հետաքննության ընթացքը:
Այս մասին Պրիստայկոն ասել է Շվեդիայի արտգործնախարար Ան Լինդեի հետ համատեղ մամուլի ասուլիսում, որն ուղիղ հեռարձակվել է Ուկրաինայի արտգործնախարարության ֆեյսբուքյան էջում:
«Մի քանի օրից մենք կկարողանանք ավելի մանրամասն պատմել, թե ինչպես է իրականացվում հետաքննությունը, մասնավորապես, սև արկղերի հետ աշխատանքը և փոխհատուցման խնդիրը»,- ասել է Պրիստայկոն:
Հիշեցնենք, որ ավելի վաղ Ուկրաինայի ազգային անվտանգության և պաշտպանության խորհրդի քարտուղար Ալեքսեյ Դանիլովը իրանցի գործընկեր Ալի Շամխանիի հետ հանդիպում էր անցկացրել Թեհրանում, որի ընթացքում քննարկվել են Իրանում տեղի ունեցած վթարի հետաքննության հարցերը:
Հիշեցնենք նաև, որ ուկրաինական ինքնաթիռն իրանական օդուժի կողմից Թեհրանի երկնքում սխալմամբ գնդակոծվել և վթարվել էր հունվարի 8-ին, որին զոհ էր գնացել 176 մարդ:
