Իրանը, հնարավոր է, դուրս գա Միջուկային զենքի չտարածման վերաբերյալ համաձայնագրից
Իրանի խորհրդարանը շատ շուտով քննարկման կդնի մի բանաձև, որով Իրանի Իսլամական Հանրապետության կառավարությանը կոչ կարվի՝ դուրս գալ Միջուկային զենքի չտարածման վերաբերյալ համաձայնագրից:
Այս մասին հաղորդում են իրանական ԶԼՄ-ները՝ հիշեցնելով, որ բանաձևն, այնուամենայնիվ, դեկլարատիվ բնույթ կկրի, որովհետև միջուկային ծրագրի վերաբերյալ որոշումները կայացնում է բացառապես Գերագույն առաջնորդ Այաթոլլա Ալի Խամենեին:
Հիշեցնենք, որ հունվարի 20-ին համաձայնագրից Իրանի հնարավոր դուրսբերման մասին հայտարարել էր Իրանի ԱԳ ղեկավար Ջավադ Զարիֆը: Վերջինս ընդգծել էր, որ դա տեղի կունենա այն դեպքում, եթե Եվրամիությունը նույնպես հակաիրանական պատժամիջոցներ սահմանի: Նույն արդյունքը կլինի այն պարագայում, եթե իրանական միջուկային գործը փոխանցվի ՄԱԿ-ին:
Հիշեցնենք նաև, որ հունվարի 26-ին Իրանի Իսլամական Հանրապետության Ատոմային էներգիայի կազմակերպության փոխտնօրեն Ալի Ասգար Զարեյանն էլ հայտարարել էր, որ եթե քաղաքական ղեկավարությունը հրահանգի, իրանցի մասնագետները կկարողանան ուրանի հարստացումը շատ կարճ ժամանակամիջոցում ցանկացած մակարդակի հասցնել: Ընդ որում, Զարեյանը հայտնել էր, որ այս պահին Իրանի հարստացված ուրանի պաշարները կազմում են 1,200 կգ:
Ի դեպ, Ատոմային էներգիայի միջազգային գործակալությունը գնահատել է, որ միջուկային ռումբ արտադրելու համար Թեհրանին անհրաժեշտ կլինի առնվազն 1000 կգ ցածր հարստացված ուրան: Այսպիսով, եթե Զարեյանի հայտարարությունը համապատասխանում է իրականությաը, Իրանը շատ մոտ է միջուկային զենք ունենալուն:
