Երեկ վարչապետը շատ հստակ մատնանշեց ճանապարհը և, կարծում եմ, շատ հստակ առաջարկներ հնչեցրեց ընդդիմությանը։ Ցանկացած ընդդիմություն, որն իր նպատակը հռչակել է իշխանափոխությունը, պետք է համաձայնի այդ տարբերակներին, որովհետև իրենք 2021-ից հայտարարել են, որ խորհրդարան են գալիս մեկ նպատակով՝ վարչապետին հեռացնելու ու իշխանափոխություն իրականացնելու։ Այդ մասին լրագրողների հետ զրույցում ասաց «Քաղաքացիական պայմանագիր» խմբակցության քարտուղար Վոլոդյա Հակոբյանը՝ պատասխանելով հարցին, թե որոնք են լինելու իշխող ուժի քայլերը, եթե ընդդիմությունը դեմ քվեարկի նոր Սահմանադրությանը։
«Հիմա ռեալ շանս ունեն էդ ծրագիրն իրագործելու։ Ո՞րն է ճանապարհը՝ քվեարկել և թույլ տալ, որպեսզի Սահմանադրությունը հանձնվի ժողովրդի դատին, և, ի վերջո, ժողովուրդը որոշի՝ կողմ է նոր Սահմանադրությանը, թե դեմ»,– ասաց պատգամավորը։
Ըստ Հակոբյանի՝ տարբերակները երկուսն են, և իրենք կկարողանան հասնել իշխանափոխության և վարչապետի հրաժարականին կամ հեռացմանը թե՛ երբ ժողովուրդը կասի «ոչ», թե՛ երբ ժողովուրդը կասի «այո»։
«Վարչապետը հստակ հայտարարեց, որ եթե նույնիսկ ժողովուրդն ասի «այո» Սահմանադրությանը, խաղաղության պայմանագրի ստորագրումից, ամբողջական պրոցեսներից հետո կհեռանա»,- հիշեցրեց ՔՊ խմբակցության քարտուղարը։
Նրա խոսքով՝ ընդդիմությունն այլ ճանապարհ չունի, քանի որ նրանք 2021-ից սկսած՝ տարբեր եղանակներով՝ փողոցային պայքարով, մի քանի տարբեր շարժումներ սկսելով, իշխանափոխության հասնելու տարբերակներ չեն ունեցել, որովհետև իրենց համար հենարան են համարել ոչ թե ժողովրդի հետ անկեղծ երկխոսությունը, այլ տարատեսակ «էլիտաների» միջոցով հեղափոխություններ կամ իշխանափոխություններ անելը։
«Այդ տարբերակները բազմիցս կիրառվել են ու արդյունքի չեն հասցրել։ Եթե իրենք չհամաձայնեն մեր առաջարկին, ինչպես վարչապետն ասաց, մենք իրենց կհեռացնենք ու կհասնենք խաղաղության պայմանագրի ստորագրմանն ու խաղաղության ինստիտուցիոնալացմանը»,- նշեց նա։










