Սիրիայի նախագահը և քրդերի աշխարհազորի առաջնորդը բանակցություններ են վարել
Սիրիայի նախագահ Ահմեդ ալ Շարաան և քրդերի՝ Սիրիական ժողովրդավարական ուժերի (SDF) ղեկավար Մազլում Աբդին հանդիպել են Դամասկոսում և քննարկել SDF-ի ինտեգրումը սիրիական զինված ուժերին, հաղորդում է The National-ը՝ հղում անելով սիրիական պետական հեռուստատեսությանը։
Ալ Շարաան և Աբդին խոսել են անցյալ տարվա հունվարին ձեռք բերված համաձայնագրի կատարման մասին, որով դադարեցվեցին մարտերը Սիրիայի կառավարական ստորաբաժանումների և SDF-ի միջև և նախատեսվում է աշխարհազորայինների ընդգրկում երկրի պետական կառույցներում:
Սիրիացի քրդերից աղբյուրը պարբերականին ասել է, որ Աբդին հասկանում է SDF-ը վաղ թե ուշ լուծարելու անհրաժեշտությունը։ Սակայն, ըստ The National-ի աղբյուրի, SDF-ի առաջնորդը չի համաձայնի նման լուծարման, եթե աշխարհազորի հրամանատարները չմնան զինված ուժերում, և Սիրիայի հյուսիս-արևելքում գտնվող ոստիկանությունը չներառի զգալի քրդերի։ «Դամասկոսը, կարծես, պատրաստ է զիջել ոստիկանության վերահսկողության մի մասը, սակայն հիմնական անհամաձայնությունը բանակում SDF-ի դիրքի շուրջ է: Ալ Շարաան ցանկանում է ցրել քուրդ զինյալներին, մինչդեռ Աբդին՝ ոչ»,- ասել է աղբյուրը։
National-ը հիշեցնում է, որ SDF-ն «Իսլամական պետության» դեմ միջազգային կոալիցիայի արշավի հիմնական ցամաքային ուժն էր, և ԱՄՆ-ն 1 միլիարդ դոլար է ներդրել SDF-ում: Սակայն աջակցությունը նվազել է, երբ Վաշինգտոնի և Դամասկոսի միջև կապերը կարգավորվել են: Ի վերջո, ԱՄՆ-ն հունվարին միջնորդել է կողմերի միջև համաձայնագրի կնքմանը, որի արդյունքում Սիրիայի կառավարական ուժերը վերահսկողություն են հաստատել SDF-ի՝ Եփրատ գետի երկայնքով տարածքի մեծ մասի նկատմամբ, որտեղ կենտրոնացված է սիրիական նավթի ու գազի պաշարների հիմնական մասը, ինչպես նաև էլեկտրաէներգիա արտադրող հզորությունները: SDF-ն պահպանել է վերահսկողությունը հյուսիս-արևելքում գտնվող հիմնականում քրդաբնակ քաղաքային կենտրոնների նկատմամբ, որտեղ Սիրիան սահմանակից է Իրաքին և Թուրքիային:
