Զելենսկին Թուրքիայի արտգործնախարարին պարգևատրել է «Ծառայությունների համար» 2-րդ աստիճանի շքանշանով
Ուկրաինայի նախագահ Վոլոդիմիր Զելենսկին Կիևում հանդիպել է Թուրքիայի արտգործնախարար Հաքան Ֆիդանի հետ և նրան պարգևատրել «Ծառայությունների համար» 2-րդ աստիճանի շքանշանով:
Զելենսկին հայտնել է, որ կողմերը քննարկել են խաղաղ ջանքերն ակտիվացնելու դիվանագիտական քայլերը, իրավիճակը ռազմաճակատում, ինչպես նաև երկկողմ հարաբերությունները: Հատուկ ուշադրություն է դարձվել Ուկրաինայի և Թուրքիայի միջև ազատ առևտրի գոտու մասին համաձայնագրի իրականացմանը։
Զելենսկին հույս է հայտնել, որ ապրանքաշրջանառությունը կաճի, և շնորհակալություն է հայտնել Ֆիդանին այցի, համագործակցության և խաղաղության մոտեցմանն ուղղված համատեղ աշխատանքի համար:
Թուրքիայի արտգործնախարարն էլ հայտարարել է, որ իր այցը Կիև շատ արդյունավետ է եղել։ Ֆիդանի խոսքով՝ Ուկրաինայի խորհրդարանի կողմից հավանության արժանացած ազատ առևտրի մասին համաձայնագիրը կարևոր հանգրվան է, որը նոր հնարավորություններ կստեղծի երկու երկրների գործարարների համար և տնտեսական գործընկերությունը կբարձրացնի նոր մակարդակի:
Ֆիդանը կրկին ընդգծել է Թուրքիայի պատրաստակամությունը՝ աջակցելու այցի արդյունքներով ՌԴ-ի և Ուկրաինայի միջև խաղաղ բանակցությունների անցկացման նախաձեռնություններին:
