ԱՄՆ-ն պատրաստում է Իրանում ռազմական թիրախների նոր ցուցակ՝ լարվածության սրման դեպքում. NBC
ԱՄՆ զինված ուժերը կազմել են Իրանում ռազմական թիրախների նոր ցուցակ՝ այն դեպքում, եթե Վաշինգտոնը որոշի վերսկսել գործողություններն Իսլամական Հանրապետության դեմ: Այս մասին հայտնել է NBC-ն՝ հղում անելով աղբյուրներին:
Նրանց տվյալներով՝ դրանք բարդ թիրախներ են, որոնց ոչնչացումը պահանջում է ավելի մեծ ջանքեր, քանի որ Իրանի տարածքում նրանց գտնվելու վայրերը խիստ թաքցված են և ունեն անվտանգության ավելի բարձր մակարդակ: Սակայն, ինչպես նշում է հեռուստաալիքը, Պենտագոնի կողմից ցուցակի կազմումը չի նշանակում, որ ԱՄՆ-ն պատրաստվում է մոտ ապագայում հարվածներ հասցնել: Այդ թիրախների վրա հարձակումը կախված կլինի ԱՄՆ նախագահ Դոնալդ Թրամփի քաղաքական որոշումից՝ Իրանի հետ բանակցությունների վերաբերյալ:
Մայիսի 23-ին ամերիկացի առաջնորդը նշել է, որ Իրանի հետ ապագա համաձայնագրի նախագիծն ընդհանուր առմամբ համաձայնեցված է, բայց հաջորդ օրը հայտարարել է, որ կողմերը դեռևս վերջնական համաձայնության չեն եկել որոշ հարցերի շուրջ:
