Սիրիայի հարցերի ԱՄՆ հատուկ բանագնաց Ջեյմս Ջեֆրին Անկարայում բանակցությունների ժամանակ քննարկել է Սիրիայի հարցով թուրք-ամերիկյան համաձայնագիրը: Այս մասին հայտնում է Թուրքիայի պաշտպանության նախարարությունը: «Կայացել է միջգերատեսչական պատվիրակությունների հանդիպում Սիրիայի հարցով ԱՄՆ հատուկ բանագնաց Ջեյմս Ջեֆրիի և Թուրքիայի պաշտպանության փոխնախարար Յունուս Էմրե Կարաօսմանօղլուի միջև: Հանդիպմանը քննարկվել են ԱՄՆ-ում 2019-ի հոկտեմբերի 17-ին ստորագրված համաձայնագրին վերաբերող հարցեր: Բանակցություններից հետո Թուրքիայի պաշտպանության նախարար Հուլուսի Աքարն ընդունել է Սիրիայի հարցով ԱՄՆ հատուկ բանագնացին ու Անկարայում ԱՄՆ դեսպանին»,- նշված է հաղորդագրության մեջ:
