Ատոմային էներգիայի միջազգային գործակալության (ԱԷՄԳ) ներկայացուցիչներն Իրան կատարելիք այցի ընթացքում հնարավորություն չեն ունենա ստուգելու Իրանի միջուկային օբյեկտները: Այդ մասին հայտարարել է Իրանի Մեջլիսի ազգային անվտանգության և արտաքին քաղաքականության հարցերով հանձնաժողովի նախագահ Էբրահիմ Ազիզին։
«Մեջլիսի ընդունած օրենքների համաձայն՝ ԱԷՄԳ-ի պատվիրակությանը, ինչպես ցանկացած այլ օտարերկրյա տեսուչների, ոչ մի դեպքում չի տրամադրվի ֆիզիկական հասանելիություն իրանական միջուկային օբյեկտներին»,- ասել է նա իրանական Tasnim լրատվական գործակալությանը։
Իրանցի խորհրդարանականի խոսքով՝ «ԱԷՄԳ-ի պատվիրակությունն իրավասություն ունի միայն տեխնիկական խորհրդակցություններ անցկացնելու իրանցի պաշտոնյաների հետ»։
ԱԷՄԳ-ի կողմից Իրանի միջուկային օբյեկտների վրա Իսրայելի և ԱՄՆ-ի հարվածները չդատապարտելը քննադատության ալիք է առաջացրել Իսլամական Հանրապետությունում և մեղադրանքներ, որ գործակալության ղեկավարությունը քաղաքականացնում է իր գործունեությունը: Հուլիսի 2-ին Իրանի նախագահ Մասուդ Փեզեշքիանը ստորագրել էր օրենք, որով դադարեցվում է ԱԷՄԳ-ի հետ համագործակցությունը:
Հուլիսի 22-ին էլ Իսլամական Հանրապետության արտաքին գործերի նախարար Աբբաս Արաղչին հայտարարել է, որ Իրանը չի բացառում ապագայում գործակալության տեսուչների՝ իր տարածք վերադառնալու հնարավորությունը։
