Կամչատկայի ափերի մոտ տեղի ունեցած երկրաշարժից անմիջապես հետո Ճապոնիան հայտարարել է ցունամիի սպառնալիքի մասին։ Իշխանությունները հրամայել են տարհանել գրեթե 2 միլիոն մարդու Խաղաղ օվկիանոսի ափի երկայնքով գտնվող ավելի քան 220 համայնքից։
Տարհանվել են նաև Ֆուկուշիմայի ատոմակայանի աշխատակիցները։ Շահագործող ընկերության ներկայացուցիչների խոսքով՝ կայանի աշխատանքում որևէ խախտում չի գրանցվել։ 2011 թվականին ատոմակայանում տեղի էր ունեցել վթար, որի պատճառը ուժեղ երկրաշարժն ու դրան հաջորդած ցունամին էին։
Օդերևութաբանները զգուշացրել են, որ ալիքների բարձրությունը կարող է հասնել 3-4 մետրի՝ չնայած մինչ այժմ ամենաբարձր ալիքները չեն գերազանցել 1,3 մետրը։
Սպասվող աղետի գոտում դադարեցվել է գնացքների երթևեկությունը, փակվել է օդանավակայան, Nissan-ը դադարեցրել է աշխատանքն իր գործարաններում, փակվել են խանութներ:
