Քրեական ոստիկանության Սյունիքի մարզային վարչության ծառայողները մաքսանենգ ճանապարհով առանձնապես խոշոր չափերի սինթետիկ ու բուսական ծագման թմրամիջոցներ Հայաստան ներմուծելու վերաբերյալ հերթական օպերատիվ տեղեկությունն են ստացել: Հայաստանի Հանրապետության Քննչական կոմիտեի Սյունիքի մարզային քննչական վարչությունում նախաձեռնվել է քրեական վարույթ:
«Օրեր տևած համագործակցված նախապատրաստական աշխատանքից հետո իրավապահներն անցան տեղեկության իրացման գործին, որին մասնակցեցին նաև Քրեական ոստիկանության թմրամիջոցների անօրինական շրջանառության դեմ պայքարի վարչության, Պարեկային ծառայության, ինչպես նաև Քննչական կոմիտեի մարդկանց թրաֆիքինգի, անչափահասների սեռական անձեռնմխելիության և թմրամիջոցների ապօրինի շրջանառության հանցագործությունների քննության վարչության ծառայողներ:
Համատեղ աշխատանքի արդյունքում Կոտայքի մարզի Զովունի գյուղում ձերբակալվեցին Արարատի մարզի Այնթապ գյուղի բնակիչ 26-ամյա և Երևանի բնակիչ 30-ամյա երկու տղամարդիկ, որոնք ավտոմեքենաներով հանդերձ տեղափոխվեցին Համայնքային ոստիկանության Նաիրիի բաժին:
Այնթապցու մեքենայում հայտնաբերվել է 283 գրամ մեթամֆետամին և երկու կիլոգրամից ավելի մարիխուանա:
Ձերբակալվածները ներկայացվել են վարույթն իրականացնող մարմին:
Նախաքննությունը շարունակվում է»,- նշվում է հաղորդագրությունում:
