Մարտի սկզբին մենք հաջողությամբ թողարկել ենք 750 մլն դոլար ծավալով եվրոբոնդ, տոկոսադրույքը՝ 7,1 տոկոս: Այդ մասին ասուլիսի ժամանակ ասաց ՀՀ ֆինանսների նախարար Վահե Հովհաննիսյանը:
«Ուրախ ենք, որ սպրեդը, որը մենք ունեցել ենք, 2,86 տոկոսային կետ է կազմել, դա մեր վերջին թողարկման համեմատ գրեթե նույն մակարդակի է եղել, որ 2021-ին ենք թողարկել, և կազմել է 2,84 [տոկոսային կետ]:
Հատկանշական է, որ շուկայի որոշակի փոփոխությունների արդյունքում մեր նման երկրների սպրեդը զգալիորեն աճել է: Մեր նման երկրներն ավելի բարձր տոկոսադրույքներով են թողարկում, և երբ նայում ենք շուկային, ապա Ուզբեկստանի, Ռումինիայի, Թուրքիայի, Վրաստանի, Հորդանանի հետ համեմատությամբ բավականին ցածր սպրեդ ունենք»,- ասաց նախարարը:
Ըստ Վահե Հովհաննիսյանի՝ թողարկված եվրապարտատոմսերը բավականին մեծ պահանջարկ են ունեցել: Պահանջարկը գրեթե 3 անգամ ավելի շատ է եղել, քան այն ծավալը, որ թողարկվել է:
«Նոմինալ առումով տոկոսադրույքը բավականին բարձր է, որովհետև շուկայում տոկոսադրույքները վերջին տարիներին էականորեն բարձրացել են, բայց սա նաև ցույց է տալիս ՀՀ միջազգային հեղինակությունն ու հետաքրքրությունը միջազգային ներդրումային ընկերությունների կողմից: Ներդրողների աշխարհագրությունը հիմնականում եղել է Մեծ Բրիտանիայից և ԱՄՆ-ից, Եվրոպան՝ 14 տոկոս, Մեծ Բրիտանիան՝ 45 տոկոս, ԱՄՆ-ն՝ 34 տոկոս, Միջին Արևելքը և Հյուսիսային Աֆրիկան՝ 5 տոկոս»,- ասաց Հովհաննիսյանը:
Նախարարը նաև տեղեկացրեց, որ 2025 և 2026 թվականներին նոր պարտատոմսեր չեն պլանավորում թողարկել:
