Մանհայմում մեքենան մխրճվել է ամբոխի մեջ, կան վիրավորներ, հայտնում է DW-ն: Ոստիկանության տվյալներով՝ բախման հետևանքով տուժել է առնվազն 28 մարդ, որոնցից մի քանիսը միջինից ծանր վնասվածքներ են ստացել, նշվում է մեկ զոհի մասին։
Ոստիկանությունը հայտնել է, որ քաղաքի կենտրոնում լայնամասշտաբ գործողություն է իրականացնում։ Իրավապահների տվյալներով՝ միջադեպը տեղի է ունեցել քաղաքի կենտրոնական հրապարակում, որտեղ ընթացել է կառնավալային երթ։ Ոստիկանությունը քաղաքացիներին կոչ է արել խուսափել Մանհայմի կենտրոնից և մնալ տներում։ Իրավիճակն իրավապահները գնահատել են որպես «կյանքին սպառնացող»։ Ոստիկանության մամուլի քարտուղարը հայտնել է, որ «հետաքննությունը վարվում է արագացված տեմպերով»։ Սակայն հրապարակման պահին հնարավոր հանցագործի վերաբերյալ տվյալներ չեն հաղորդվել։
Bild-ի տվյալներով՝ մեքենայի վարորդը ձերբակալվել է։ Այնուամենայնիվ, քաղաքի կենտրոնի գրեթե բոլոր ճանապարհները շարունակում են փակ մնալ։ Կենտրոնից դուրս գտնվող բոլոր ճանապարհներին և կամուրջներին զինված ոստիկանները ստուգում են անձնական փաստաթղթերը։ Bild-ը նաև գրել է, որ Մանհայմի երկնքում ուղղաթիռ է պարեկություն իրականացնում։
