2011-2013 թթ. Պենտագոնի ղեկավարի պաշտոնը զբաղեցրած Լեոն Պանետան CNN-ին տված հարցազրույցում անդրադառնալով նախորդ շաբաթ Սաուդյան Արաբիայի «Արամքո» նավթային ընկերության երկու օբյեկտների դեմ իրականացված հարձակմանը՝ խոր մտահոգություն է արտահայտել Իրանի դեմ ԱՄՆ հնարավոր ռազմական գործողության հետևանքների կապակցությամբ:
«Ի վերջո, Իրանը կարող է օգտվել իր հրթիռներից՝ ԱՄՆ-ի հարձակմանը պատասխանելու և պատերազմի ընթացքը մեծ արագությամբ փոխելու համար»,- հայտարարել է Պանետան՝ Սպիտակ Տանը նախազգուշացնելով խուսափել Իրանի դեմ ռազմական գործողությունից և Սաուդյան Արաբիայի միջոցով նոր պատերազմի մեջ ներքաշվելուց:
Հիշեցնենք, որ Իրանը մերժում է Սաուդյան Արաբիայի «Արամքո» նավթային ընկերության երկու օբյեկտների դեմ հարձակվելու՝ իր դեմ ուղղված մեղադրանքները:
