Ermənistanın Yüksək Texnologiyalar Sənayesi və Süni İntellekt naziri David Tadevosyan ABŞ-a işgüzar səfəri çərçivəsində ABŞ Hərbi Departamentinin və ABŞ Dövlət Departamentinin nümayəndələri ilə görüşüb.
Görüş zamanı Ermənistan və ABŞ arasında tədqiqat və inkişaf, kibertəhlükəsizlik, yarımkeçiricilər, elektronika və qabaqcıl istehsal sahələrində texnoloji əməkdaşlığın genişləndirilməsi imkanları müzakirə edilib. TRIPP layihəsi və regional əlaqələrə də toxunulub.
David Tadevosyan tərəflərlə Ermənistanın texnoloji və mühəndislik potensialını, eləcə də Ermənistan şirkətlərinin beynəlxalq dəyər zəncirlərinə cəlb edilməsi imkanlarını təqdim edib.
“Qarşıdakı işimizi Amerika şirkətləri və tədqiqat institutları ilə əlaqələrin gücləndirilməsinə, birgə təşəbbüslərin hazırlanmasına və yeni tərəfdaşlıqların formalaşdırılmasına yönəldəcəyik.
Məqsədimiz müzakirələri konkret proqramlara və uzunmüddətli əməkdaşlığa çevirmək, Ermənistanın texnoloji sektorunun inkişafı üçün yeni imkanlar yaratmaqdır”, - deyə nazir qeyd edib.
