Oktyabrın 7-də Ermənistanın xarici işlər və beynəlxalq ticarət nazirinin müavini Vahan Kostanyan Ermənistan-Belçika Ticarət Palatasının iş adamlarından ibarət qrupunu qəbul edib. Bu barədə XİN-dən məlumat verilib.
Görüş zamanı Ermənistan-Belçika ticarət-iqtisadi əməkdaşlığının inkişafı, işgüzar əlaqələrin aktivləşdirilməsi perspektivləri müzakirə olunub. İT, səhiyyə, infrastruktur və bir sıra digər sahələrdə əməkdaşlığın genişləndirilməsinə də toxunulub.
Vahan Kostanyan Ermənistan iqtisadiyyatının inkişafının müasir meyillərini və ixrac bazarlarının diversifikasiyası istiqamətində atılan addımları təqdim edib. O, həmçinin Ermənistanın investisiya mühitinə və bölgədə bərqərar olmuş sülh şəraitində bağlantının genişlənməsi ilə yaranan yeni iqtisadi imkanlara da toxunub.
