ԼՂ կողմի հետ որևէ պայմանավորվածություն չի եղել. Արայիկ Հարությունյանի խոսնակը՝ Բաքվից հումանիտար բեռ ուղարկելու մասին
Ադրբեջանական աղբյուրներն այսօր տեղեկություն տարածեցին Բաքվից Ստեփանակերտ Կարմիր մահիկի հովանու ներքո հումանիտար բեռ ուղարկելու վերաբերյալ, սակայն ԼՂ կողմի հետ տվյալ հարցով որևէ պայմանավորվածություն չի եղել:
Այս մասին «Արցախպրեսի» հարցմանն ի պատասխան նշել է ԼՂ նախագահի մամուլի խոսնակ Լուսինե Ավանեսյանը` հավելելով, որ, հետևաբար, այդ քայլն ուղղված է եղած խնդիրները խորացնելուն, բայց ոչ լուծելուն։
«Քաշաթաղի (Լաչինի) միջանցքի՝ սահմանված ռեժիմի վերագործարկման խնդիրը եղել և մնում է առաջնահերթ, և ադրբեջանական կողմի հետ որևէ երկխոսություն պետք է ծավալվի նախ և առաջ այդ հարցի շուրջ։ Միջանցքը պետք է ազատ և անխափան գործի ինչպես մարդկանց, այնպես էլ բեռների ու մեքենաների երկկողմանի տեղաշարժի համար։ Եթե Ադրբեջանի իշխանություններն իրոք հետաքրքրված են Արցախի ժողովրդի ծանրագույն հումանիտար աղետի վերացմամբ ու ցեղասպանության կասեցմամբ, ապա պետք է ոչ թե կեղծ մարդասիրություն խաղան, այլ պարզապես չարգելեն Լաչինի միջանցքով Արցախի մատակարարումների վերականգնմանը, ինչպես նախատեսված է 2020 թ. նոյեմբերի 9-ի եռակողմ հայտարարությամբ և Արդարադատության միջազգային դատարանի հրամաններով»,- ընդգծել է Ավանեսյանը։
