Գյուղտեխնիկա և գործիքներ՝ գյուղատնտեսական աշխատանքներն առավել արդյունավետ իրականացնելու նպատակով
Լոռու մարզպետի տեղակալ Գոռ Ասրյանը մարզպետարանի գյուղատնտեսության և բնապահպանության վարչության պետ Արուս Թումանյանի, գյուղատնտեսության բաժնի պետ Արտյոմ Շահվերդյանի ուղեկցությամբ աշխատանքային այցով եղել է Լոռու մարզի Դսեղ և Շնող համայնքներում՝ վերջիններիս կողմից ձեռքբերված գյուղտեխնիկային և համայնքներում աշնանացանի նախապատրաստական աշխատանքների ընթացքին հետևելու նպատակով:
Այս տարի համայնքները պետություն-համայնք համատեղ ներդրմամբ իրականացվող սուբվենցիոն ծրագրերի շրջանակներում ձեռք են բերել գյուղատնտեսական տեխնիկա և գործիքներ՝ գյուղատնտեսական աշխատանքներն առավել ակտիվ և արդյունավետ իրականացնելու նպատակով, ինչը կօգնի զգալիորեն դյուրին դարձնել աշխատանքների ընթացքը և ավելացնել մշակովի հողատարածքները:
Դսեղ համայնքը ձեռք է բերել 5 միավոր գյուղատնտեսական գործիքներ՝ 11.200 մլն ընդհանուր արժողությամբ՝ հացահատիկի շարքացան, կուլտիվատոր, կարտոֆիլացան, կարտոֆիլահան և հողաֆրեզ (արժեքի 50 տոկոսը կազմել է պետական ներդրումը, 50 տոկոսը՝ համայնքային ներդրումը)։
Շնող համայնքը ձեռք է բերել Բելառուս տրակտոր և գութան՝ 13.600 մլն ընդհանուր արժողությամբ (արժեքի 50 տոկոսը կազմել է պետական ներդրումը, 50 տոկոսը՝ համայնքային ներդրումը)։
Մարզի պաշտոնյաներն այցելել են նաև համայնքի բնակիչների հողատարածքներ, և ուսումնասիրել ձեռք բերած նոր տեխնիկայի և գյուղատնտեսական գործիքների աշխատանքը՝ աշնանացանի նախապատրաստման ընթացքում։
