Պետություն-համայնք համագործակցության արդյունքում մեկնարկել են Սարալանջ համայնքի մշակույթի տան վերանորոգման աշխատանքները։ Այս մասին հայտնում են Շիրակի մարզպետարանից:
2021 թվականի տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրի շրջանակներում 1-ին փուլով նախատեսվում է իրականացնել 4 սենյակների, 2 սանհանգույցների, միջանցքի և աստիճանների վերանորոգման աշխատանքներ։
Վերանորոգվելուց հետո սենյակներից երեքը ծառայելու են համայնքի դպրոցահասակ երեխաների համար որպես պարի, երաժշտության և սպորտային խմբակների, իսկ մեկը՝ համայնքի տարեց բնակիչների ժամանցի վայր։
Ծրագրի ընդհանուր արժեքը 14 մլն 805 հազար դրամ է, որի 50 տոկոսը հատկացնելու է պետությունը, 50 տոկոսը համայնքն է տրամադրելու։ Շինարարական աշխատանքներն իրականացվում են «Նար Դայ» ՍՊԸ կողմից:
