Տնտեսական մրցակցության պաշտպանության պետական հանձնաժողովի նիստում հրապարակվել է «Յանդեքս» տաքսի ծառայության գործունեության ուսումնասիրության արդյունքը: Հակամենաշնորհային հանձնաժողովի սեփական նախաձեռնությամբ իրականացված ուսումնասիրության արդյունքում պարզ է դարձել, որ «Յանդեքսի» գործունեությունը չի համապատասխանում օրենքի պահանջին և պարունակում է հակամրցակցային գործունեության տարրեր:
Հանձնաժողովը նաև փաստել է, որ այս ընկերությունը մի քանի ամիսների ընթացքում ոչ միայն շահույթ չի ստացել, այլև փաստացի աշխատել է վնասով՝ սեփական գրպանից անհարկի գումարներ վճարելով վարորդներին, ինչն առնվազն բիզնես տրամաբանությունից դուրս գործելաոճ է: Հակամենաշնորհային հանձնաժողովի դիտարկմամբ, այս գործելաոճը կարող էր հանգեցնել դաշտից որոշ տաքսի ծառայությունների դուրս մղվելուն:
Խնդիրը կանխելու նպատակով հանձնաժողովը խիստ նախազգուշացում է տվել «Յանդեքսին»: Էլեկտրոնային հարթակի միջոցով տաքսի ծառայություն մատուցող մյուս ընկերությունների վարքագիծը ևս հայտնվել է հակամենաշնորհային հանձնաժողովի դիտակետում:
