ՀՀ էկոնոմիկայի նախարար Տիգրան Խաչատրյանն ու փոխնախարար Տիգրան Գաբրիելյանն այցելել են «Երեմյան Փրոջեքթս» ընկերության՝ Ջերմուկում գործող տոհմային տավարաբուծական ֆերմա՝ ծանոթանալու արտադրության գործընթացին և ծրագրերին, տեղեկացնում են էկոնոմիկայի նախարարության տեղեկատվության և հասարակայնության հետ կապերի վարչությունից։
Նախարարն ու փոխնախարարը շրջել են անասնապահական համալիրի կաթնատու և մսատու կովերի ֆերմաներում, որտեղ պահվում և բուծվում են մաքրացեղ անգուս, ֆլեկվի և հոլշտեյն տոհմային բարձրարժեք գենետիկայով խոշոր եղջերավոր կենդանիներ, ծանոթացել կենդանիների բարեկեցության, խնամքի, կերակրման, վերարտադրության պայմաններին: Շրջայցի ընթացքում ընկերության գլխավոր տնօրեն Դավիթ Երեմյանը ներկայացրել է անասնապահական ֆերմայում բարձրորակ կաթի արտադրության համար ներդրված միջազգային չափանիշներին համապատասխան տեխնիկան ու սարքավորումները, կովերի կերակրման և պահման առաջադեմ մեթոդաբանությունը:
Ֆերմայում իրականացվում է մեքենայացված կիթ. կովերի մաքուր, ախտազերծված կաթն անմիջապես խողովակներով հոսում է դեպի փակ սառնարան՝ այդպիսով զերծ մնալով արտաքին միջավայրի հետ շփումից և պահպանելով համային ու հոտային որակական հատկանիշները: Համապատասխան ջերմաստիճանը պահպանելով` հատուկ մեքենայով կաթը տեղափոխվում է «Արցախ» խոհանոց-գործարանի կաթի վերամշակման արտադրամաս, որտեղ անցնում է անհրաժեշտ մշակումները՝ պաստերիզացումից մինչև փաթեթավորում:
Կաթի որակի ապահովման գործում մեծ դեր ունի կենդանիների կերակրման գործոնը և «Երեմյան Փրոջեքթս»-ում սա ևս հաշվի են առել. հիդրոպոնիկ համակարգով աճեցված թարմ կանաչ կերի և առվույտի վիտամիններով ու ֆերմենտներով հարուստ խառնուրդը հատուկ կերախոհանոցում վերամշակում անցնելուց հետո մատակարարվում է կենդանիներին: Ֆերմայում ավտոմատացված է նաև կերի բաժանումն ու կերակրման գործընթացը:
Ֆերմայում կենդանիները ոչ միայն կանոնավոր և առողջ սնվում են, այլև խնամվում են հիգիենայի պահանջներին համապատասխան կանոններով: Իրականացվում է կանոնավոր ախտահանում, կիրառվում են ջրամատակարարման ավտոմատ սարքեր, ավտոմոտ քորիչներ, ֆիլտրեր, օդափոխության համակարգ, կերակրման ավտոմատացված համակարգեր և այլն։ Կենդանիների ֆիզիոլոգիական իրավիճակի հաշվետվության-հաշվառումը թարմացվում է ամեն օր․ յուրաքանչյուր կենդանի ունի չիպ, որում առկա կյանքին վերաբերող տեղեկատվությունը կառավարվում է հատուկ ներդրված համակարգչային ծրագրի միջոցով:
Շրջայցի ընթացքում Տիգրան Խաչատրյանը ընկերության գլխավոր տնօրենի հետ քննարկել է ընկերության ներդրումային ծրագրերը, ֆերմերային տնտեսությունների նախագծերի զարգացման հեռանկարներն ու ընկերության արտադրական հզորությունների ավելացմանն առնչվող մի շարք հարցեր:
Դավիթ Երեմյանը նշել է, որ 2018-2019 թթ. գյուղատնտեսության ոլորտում ներդրումների իրականացման շնորհիվ ընկերությունը մեկնարկել է երկու խոշոր նախագիծ՝ գործարկվել են խոզաբուծական և տոհմային տավարաբուծական ֆերմաները, ձեռք են բերվել մաքրացեղ խոշոր եղջերավոր կենդանիներ և սկսվել է կաթի և կաթնամթերքի արտադրությունը:
Նախարար Տիգրան Խաչատրյանն, ամփոփելով այցն, ընդգծել է ընկերության գործունեության մի քանի կարևոր առանձնահատկություն և արել որոշ դիտարկումներ․ «Կարևոր է, որ տնտեսությունը նախատեսում է առաջիկա ամիսների իր գործունեության ընթացքում առաջարկել նաև տոհմային կենդանիներ, ինչը իրական հնարավորություն կդառնա այն տնտեսությունների համար, որոնք․ առավելությունները տեսնելով և գնահատելով, մտադիր են իրենց տնտեսությունները վարել: Իսկ մենք մեր ծրագրերով շարունակում ենք աջակցել նաև տոհմային անասնաբուծությանը, խոշոր եղջերավոր կենդանիների դեպքում վարկավորել արտոնյալ վարկերով` կիրառելով այս տարվա ընթացքում 0 տոկոս տոկոսադրույքը: Կարծում ենք, որ այս բոլոր գործոնների համադրությամբ և այն օրինակներով, որ այս տնտեսությունում առկա են և հասանելի, մենք կկարողանանք մարդկանց ցույց տալ, տեղեկատվությունը հասանելի դարձնել և խրախուսել, որպեսզի այդ եղանակով տնտեսություն վարելն ավելանա ոչ թե մի քանի օրինակով, այլ դառնա համատարած»։
Փոխնախարար Տիգրան Գաբրիելյանը, կիսվելով այցի տպավորություններով, նշել է, որ ուրախ է արձանագրել, որ այս տնտեսությունը նաև ակտիվ համագործակցում է պետական օժանդակության ծրագրերով և արդեն իսկ ունի արդյունքներ․ 207 գլուխ տոհմային մաքրացեղ կենդանիներ են ներկրվել տնտեսություն, որից 175 գլուխ ֆլեկվի ցեղատեսակի և 33 գլուխ անգուս ցեղատեսակի։ Փոխնախարարի խոսքով՝ այսօր իրենք համոզվեցին, որ «Երեմյան Փրոջեքթս» ընկերության ֆերմայում տեղայնացված է և կիրառվում է միջազգային լավագույն փորձը: Տիգրան Գաբրիելյանը նաև ընդգծել է ընկերության առավելություններից մեկը՝ ֆերմայի կթի սրահում իրականացվող մեքենայացված կիթը, ինչը որակյալ կաթի արտադրության համար հիմնական երաշխիքն է:
