Թեհրանը ցանկանում է համաձայնության գալ, սակայն չի առաջարկում այնպիսի պայմաններ, որոնք ընդունելի կլինեն Վաշինգտոնի համար՝ հայտարարել է ԱՄՆ նախագահը։ Դոնալդ Թրամփի խոսքով՝ ամերիկյան կողմը ձգտում է իրական, այլ ոչ թե դատարկ գործարք կնքել։ Նա Իրանի դեմ գործողությունները բնորոշել է որպես «ոչ մեծ ռազմական գործողություն»։
Թեհրանի հետ համաձայնության հասնելու ամերիկյան կարևոր պայմաններից են Իսլամական Հանրապետության ապամիջուկայնացումը և միջուկային զենքի մշակման դադարեցումը։ Թեհրանը հերքում է, որ միջուկային զենք ունի կամ պատրաստվում է այն ձեռք բերել։
Իրանից էլ հայտնել են, որ պատրաստ են ԱՄՆ-ի հետ բանակցությունների՝ հատկապես Հորմուզի նեղուցի հարցով, սակայն դեռ ակնկալում են, որ Վաշինգտոնը կառուցողական դիրքորոշում կորդեգրի։ ԱԳ նախարար Աբբաս Արաղչին կրկնել է, որ ամերիկյան կողմը պետք է կատարի Թեհրանի 7 պայմանները։
Իրանն ավելի վաղ յոթ պայման էր առաջադրել Վաշինգտոնի հետ բանակցությունները վերսկսելու և Հորմուզի նեղուցը բացելու համար։ Դրանց թվում են բոլոր ճակատներում ռազմական գործողությունների դադարեցումը, Իրանի ծովային շրջափակման վերացումը և իրանական ակտիվների ապասառեցումը։
Արաղչին հավելել է՝ որոշակի մակարդակով հարստացված իրանական միջուկային նյութերը երկրից դուրս չեն բերվի, այդ պաշարները կօգտագործվեն՝ հաշվի առնելով Իսլամական Հանրապետության կարիքները։








